Врие од интернет измами во Македонија. Особено е алармантна појавата на лажни СМС за пристигнати пратки од пошта како и лажни фактури за уплата, но од лажни адреси, објави МРТ1. За ваков вид на измами само годинава до Секторот за компјутерски криминал пристигнати се 43 пријави од измамени граѓани.
„Пораките обично изгледаат како да доаѓаат од доверливи извори, како банки, државни институции, реномирани компании, но имаат за цел да ги измамат корисниците и да ги добијат нивните лични или финансиски податоци“, велат од МВР за МРТ1.
Главно, измамниците фокусирани се на фишинг напади, е-маил комуникација, како и креирање на лажни реклами со познати личности. Во текот на последната година, забележано е дека измамниците користат различни напредни методи за манипулација со жртвите. Додека онлајн продажбата расте, растат и измамите, особено на социјалните мрежи.
22 пријави има и за манипулации преку лажни телефонски повици, при што измамниците ги убедуваат жртвите да инсталираат софтвер со ветување дека ќе заработат од криптовалути, а потоа им ги празнат банкарските сметки. Измамниците се служат со фишинг напади, но одат дотаму што се креираат и лажни реклами со познати личности. Граѓаните свесни за ризиците, но не сите знаат како да се заштитат.
Кога се купува преку интернет, граѓаните да отворат четири очи, велат експертите. Алармираат ако во случај забележат дека им се злоупотребени личните податоци или банкарски картички, веднаш да пријават во МВР и Агенцијата за заштита на личните податоци.
Граѓаните во никој случај да не отвораат сомнителни линкови и пораки.
Надлежните велат дека во земјава се уште нема механизам со кој би се спречиле онлајн измамите, но затоа алармираат да се внимава, за да не останат граѓаните и без пари, и без производ.
Надлежните со апел, никогаш да не се споделуваат лични податоци, како што се броеви на банкарски картички или лозинки преку неовластени канали.