За 5 месеци, системот „Безбеден град“ фати над 100.000 возачи кои прават прекршоци на патиштата во Македонија.
Наместо да се намалува, „Безбеден град“ бележи зголемување на сообраќајните прекршоци секој месец од спроведувањето на проектот. Најголемиот број од нив се поврзани со возење со поголема брзина од дозволената.
Во периодот од 2 февруари до 31 мај 2026 година, системот „Безбеден град“ регистрирал вкупно 101.834 прекршоци:
Од нив 19.066 во февруари,
26.241 прекршок во март,
28.033 прекршоци во април.
Во мај се регистрирани 28.494 сообраќајни прекршоци.
Најголем број е за „управување со возило со брзина што ја надминува дозволената брзина“ – 70.365, по што следат 2.519 прекршоци за „управување со возило со истечена дозвола“, а 456 прекршоци се евидентирани за „поминување на затворен семафор – црвено светло“, велат од Министерството за внатрешни работи.
Системот „Безбеден град“ евидентирал и возачи кои возат со над 170 километри на час во населено место.
Сообраќајните експерти велат дека за поголем сообраќаен ред не можеме да се потпреме само на системот „Безбеден град“. Недостасува полициско присуство на патиштата и потребни се повеќе инвестиции во сообраќајната инфраструктура.
Министерството за внатрешни работи вели дека нивните екипи се постојано на терен. Минатиот месец, полициските екипи издале 16.885 казни за сообраќајни прекршоци и заплениле 238 возила.