Возач ангажиран за потребите на Генералниот секретаријат на Владата, со иницијали Д. Ц., е уапсен при примање поткуп со претходно обележани парични средства, потврдија од Владата. Соопштението од Владата доаѓа откако претходно Министерството за внатрешни работи и Основното јавно обвинителство за гонење организиран криминал и корупција излегоа со информации дека лицето е приведено и определен му е 30-дневен притвор.
Од Владата потврдуваат дека случајот бил отворен по иницијатива и пријава од самите институции на кои им било пријавено барањето за поткуп. Затекнувањето на осомничениот се случило на 4 септември 2026 година, во моментот кога му биле предавани 500 евра со претходно обележани банкноти. Оваа сума била дел од вкупно побараната награда од 1 500 евра.
Од Владата појаснуваат дека уапсеното лице во моментот на делото работело како возач за Генералниот секретаријат, а работниот однос претходно го засновало преку Службата за општи и заеднички работи (СОЗР). Акцијата била спроведена во соработка со Министерството за внатрешни работи (МВР). Од Владата истакнуваат дека овој случај ја потврдува нивната заложба за бескомпромисна борба против корупцијата и докажува дека законите важат исто за сите, без разлика на позицијата.
По пријавувањето, надлежните органи, во координација со предметниот обвинител, презедоа дејствија за обезбедување докази. На 4 септември 2026 година, осомничениот е затекнат при примопредавање на 500 евра како дел од побараната награда од 1.500 евра, кои претходно биле обележани, соопшти Обвинителството.
Ценејќи дека постојат околности што укажуваат на опасност од бегство, можност осомничениот да влијае врз сведоците во постапката, како и околности што го оправдуваат стравувањето дека може да го повтори кривичното дело, јавниот обвинител до судијата на претходна постапка достави предлог за определување мерка притвор. Судијата на претходна постапка го прифати предлогот на обвинителството и со решение на осомничениот му определи притвор во траење од 30 дена.
Навременото пријавување на корупцијата и подготвеноста на граѓаните да соработуваат со надлежните институции е исклучително важно. Пријавувањето на барање или понуда за поткуп и противзаконито влијание овозможува навремена реакција, обезбедување докази и ефикасно постапување на надлежните органи. Јавното обвинителство ги охрабрува граѓаните да ги пријавуваат ваквите случаи и да соработуваат со надлежните институции и останува посветено на одлучно постапување по сите сознанија за коруптивно однесување за кои постојат основи за преземање обвинителски дејствија.