Во Тирана синоќа се оддржа 21-от протест против проектот „Зврнец“, кој според организаторите бил најмасовен досега. На собирот учествувале и Албанци од соседните земји, како и претставници на дијаспората од западноевропските земји и од САД.
Според слободни процени, на протестот присуствувале околу 250.000 граѓани. Тие повторно побараа оставка од премиерот Еди Рама, запирање на проектите во Зврнец и во Сазан, како и поништување на законот од 2024 година со кој се овозможува градба во заштитени подрачја и на законот за стратешки инвеститори.
Демонстрантите најпрво се собраа на плоштадот „Скендербег“, по што маршираа кон зградата на Владата, каде што неколку граѓани се обратија пред насобраните.
По повеќе од два часа говори, учесниците го продолжија маршот околу владината зграда, низ центарот на градот и покрај познатиот објект „Пирамида“.
Мал дел од демонстрантите ја поминаа ноќта пред Владата, испраќајќи порака и до премиерот Еди Рама и до опозицискиот лидер Сали Бериша дека треба да заминат од политичката сцена.
Учесниците предупредија дека протестите може да се радикализираат доколку нивните барања не бидат исполнети.