Само неколку месеци по приклучувањето кон Еврозоната, Бугарија се наоѓа под закана од европски санкции. Новиот премиер Румен Радев предупреди дека земјата ќе мора да преземе болни мерки за да го намали буџетскиот дефицит.
Тој ја обвини претходната власт дека зад себе оставила сериозни финансиски проблеми.
Според него, Европската комисија на 3 јуни ќе го објави извештајот што може да ја активира постапката за прекумерен дефицит. Тоа би значело засилен надзор врз буџетската политика на Софија и можни финансиски последици.
Според правилата на Европската Унија, буџетскиот дефицит не смее да надмине 3 проценти од бруто-домашниот производ. Минатата година бугарскиот дефицит достигнал 3,5 проценти.
Доколку Софија не успее да ја врати потрошувачката во дозволените рамки, Брисел може да замрзне дел од европското финансирање. Во краен случај, предвидени се и финансиски казни.
Радев оцени дека актуелната состојба е резултат на години лошо управување со јавните финансии. Тој ја обвини претходната проевропска влада на Росен Жељазков за неодговорно трошење и прикривање на вистинската состојба во буџетот.
– Сега доаѓа време за тешки прашања и Европската комисија ќе нè праша зошто некои луѓе ја излажаа – изјави Радев.
Тој најави дека владата ќе бара одговорност за сите злоупотреби и дека ќе се обиде постепено да ги стабилизира јавните финансии.
Тешка задача за новата влада
Радев предупреди дека стабилизирањето на буџетот нема да биде лесна задача. Според него, ќе бидат потребни години за државните финансии повторно да се вратат во нормални рамки.
Бугарската влада сега се соочува со предизвик да го намали дефицитот без дополнителен удар врз економијата, во период кога земјата штотуку се приклучи кон заедничката европска валута.