Полицијата во Република Албанија ја финализирала операцијата со кодно име „Скенер“, при што е уапсен 42-годишник од градот Макелара кој превезувал шверцувана стока од Македонија, како и царински службеник од подружницата Блато осомничен за корупција и злоупотреба на службена должност.
За време на претресот, запленети се стока, возило и парични суми во различни валути.
Во известувањето од полицијата се вели дека
полициската операција со кодно име „Скенер“ ја спровел Одделот за истраги на економски и финансиски криминал.
42-годишникот е уапсен откако бил фатен на дело додека превезувал стока што ја шверцувал од Република Македонија.
Уапсен е и царински службеник од подружницата Блато, бидејќи се сомнева дека преку корупција дозволил да се изврши оваа криминална активност.
Уште еден царински службеник од оваа подружница е под истрага, осомничен за злоупотреба на службена должност.
Како резултат на брзото администрирање на информациите добиени оперативно, во врска со случај на шверц на разновидна стока преку ГП Блато, специјалистите од Одделот за истраги на економски и финансиски криминал ја финализираа операцијата „Скенер“, објави албанската полиција.
Во рамките на операцијата:
– државјанинот А.Ц., 42 години, жител на село Маќелара, е уапсен за кривични дела „Активна корупција на лица кои вршат јавни функции“, „Шверц на друга стока“, „Шверц на забранета или ограничена стока“, „Трговија и транспорт на контрабандирана стока“ и „Прикривање приходи“;
– државјанинот А.Л., 51 година, жител на Тирана, кој работи како царински службеник во царинската подружница Блате, е уапсен за кривични дела „Пасивна корупција на лица кои вршат јавни функции“ и „Злоупотреба на службена положба“;
– е покрената постапка против државјанинот Е.М., 50 години, жител на Корча, кој работи како царински службеник во царинската подружница Блато, за кривично дело „Злоупотреба на службена положба“.
На територијата на административната единица Маќелара, запрено е возило „Опел“ управувано од 42-годишен маж. За време на претресот, во возилото е пронајдена сомнителна шверцувана стока (кутии со детергенти и материјали за пакување), бидејќи не биле опремени со фактури за купување.
Од понатамошните истраги за овој случај, се сомнева дека двајцата царински службеници ја злоупотребиле својата положба, фаворизирајќи го 42-годишниот маж за извршување на ова кривично дело.
Процесните материјали се упатени до албанското Обвинителство при Основниот суд за општа надлежност во Дибер, за понатамошно постапување.