Во Источна Европа е откриена мрежа која регрутира локални жители за извршување саботажи и дестабилизирачки операции во европските земји во интерес на Руската Федерација, објави „Укринформ“.
Според соопштението на Центарот за борба против дезинформациите при Советот за национална безбедност и одбрана на Украина, регрутерите им нудат на граѓаните од Молдавија, Бугарија, Србија и други источноевропски земји „лесни пари“ – од 300 до 500 долари, како и платено двонеделно патување со активна рекреација.
Меѓутоа, во реалноста, регрутираните лица завршуваат во специјални кампови за обука, каде што се обучуваат да управуваат со дронови, да користат запаливи направи и да се спротивставуваат на полицијата за време на протести.
Инструктори во овие кампови се лица поврзани со поранешната приватна воена компанија „Вагнер“.
По завршувањето на „обуката“, регрутите се испраќаат во различни европски земји за да извршуваат „хибридни напади“ и саботажни операции.
Учеството на поранешни припадници на „Вагнер“ во ваквата обука покажува дека Русија има намера да го искористи своето борбено искуство за извоз на насилство во странство.
Овој метод ѝ овозможува на Москва да го намали ризикот од директно откривање и значително да ги зголеми можностите за спроведување саботажи низ Европа.
Според западни разузнавачки извори, регрутерите и пропагандистите кои претходно работеле за рускиот ПМЦ „Вагнер“ станале главна алатка на Кремљ за организирање саботажни операции во европските држави.