Прелиминарните резултати од парламентарните избори кај источниот сосед на Македонија навестуваат уверлива победа на експретседателот Румен Радев со неговата новоформирана партија Прогресивна Бугарија со 37,5 проценти од гласовите.
Далеку зад „прогресивците“ на донеодамнешниот шеф на државата е коалицијата ГЕРБ-СДС предводена од поранешниот премиер Бојко Борисов со 16,2 отсто, а трет е коалицискиот двоец Продолжуваме со промената – Демократска Бугарија со 14,3 отсто.
Во новиот состав на Собранието ќе влезат уште три политички субјекти, и тоа Движењето за права и слободи (ДПС) со 8,4 проценти, Преродба со 4,9 отсто и Бугарската социјалистичка партија (БСП) со 4,1 отсто.
Ако остане вака, во Парламентот од 250 члена огромно мнозинство, но недоволно за самостојно формирање влада, ќе има Прогресивна Бугарија со 105 мандати, пред ГЕРБ-СДС со 46, ПП-ДБ со 40, ДПС со 24, Преродба со 14 и БСП со 11.
Под цензусот од 4 проценти се МЕЧ, Алијанса за права и слободи (АПС), Величие, „Сијание“ и досега парламентарната Има таков народ на Слави Трифонов, која совои само 1 отсто гласови, според првичните резултати,
Излезеноста на избирачите до 19 часот беше 46,76 проценти.