Српскиот претседател Александар Вучиќ синоќа изјави дека е прифатено главното барање на блокадорите и дека предвремените парламентарни избори ќе бидат распишани следната година.
„Го прифативме нивното главно барање, наскоро ќе одиме на избори, следната година. Тие едноставно нема да бидат толку среќни кога ќе ги пребројат гласовите. Ќе ги победиме на секое место во Србија“, рече Вучиќ, обраќајќи се пред собраните граѓани пред Домот на Народното собрание.
Изјавата на Александар Вучиќ дојде откако српските студенти почнаа да собираат потписи низ целата земја во поддршка на нивното барање за предвремени парламентарни избори, за кои се надеваат дека ќе помогнат во соборувањето на владата потчинета на Вучиќ.
Студентите поставија речиси 500 штандови во десетици градови и села за граѓаните да го потпишат барањето за избори.
Уличните протести во Србија започнаа во ноември 2024 година по трагедијата на железничката станица во која загинаа 16 лица.
Вучиќ рече дека е горд што немало жртви за време на протестите против блокадата, наведувајќи како пример дека десетици луѓе загинале за време на протестите и уличните демонстрации на „жолтите елеци“ во Франција.
„Колку и да имам енергија, колку и да имам сила, ќе ми биде чест да бидам со вас во борбата против сите оние кои сакаат да ја уништат нашата земја“, рече Вучиќ, прецизирајќи дека тоа „мора да биде политичка борба“.
Тој потсети дека во Србија една година се случувале насилни судири меѓу блокадерите, во кои биле уништени партиските канцеларии на Српската напредна партија, а некои луѓе биле претепани.