Успешен старт на Лина Ѓорческа на тенискиот челинџер „Гран-при опен Вилја де Мадрид“ од серијата ВТА125 во главниот град на Шпанија, кој се игра на земјени терени и за награден фонд од 115.000 американски долари.
Најдобрата македонска тенисерка, неделава 199. на ВТА-листата во поединечна конкуренција, во првото коло славеше со 6-4, 6-4 над квалификантката Сара Саито (300.) од Јапонија.
Дуелот траеше 91 минута и го обележа лошиот сервис на двете тенисерки, при што Ѓорческа направи 13 двојни грешки наспроти петте на противничката и загуби пет гема со почетен удар, но направи седум брејка и на крајот ја искористи втората меч-топка.
Следна пречка за 31-годишната тетовка во осминафиналето утре од 11 часот ќе ѝ биде 18-годишната осма носителка Алина Корнеева (122.) од Русија.