Успешна генерална проба за машката кошаркарска репрезентација за завршницата од претквалификациите за Европското првенство 2029 година – совладана Бугарија со 91:87 во спортската сала „Лазар Лечиќ“ во скопскиот Градски парк.
Избраниците на селекторот Жозеп Марија Берокал ги добија втората четвртина со 24:21 и последната со 25:21, а на источниот сосед му припаднаа првата со 22:21 и третата со 23:21, па „црвено-жолтите“ на крајот се реваншираа за поразот со некомплетен состав од 97:68 во Самоков.
Дивејн Стјуарт се покажа како големо засилување за македонскиот тим, постигнувајќи 26 поени и по пет скока и асистенции за нецели 31 минута на паркетот.
И без Андреј Јакимовски во второто полувреме, и без плејмејкерот Мартин Петков, кој се повреди по помалку од гтри минути на теренот, македонските кошаркари демонстрираа решеност да им вратат на Бугарите и во ведра атмосфера да ги дочекаат дуелите со Република Ирска на 2 јули од 18 часот во Скопје и со Луксембург три дена подоцна на негов терен од 16 ч.
Македонија води во групата А со максимални четири победи, пред Луксембург со 2/2, а Азербејџан и Ирска имаат скор 1/3.