Со победата над домашната тенисерка Елена Бертеа од 2:1 во сетови на турнирот „Напарис трофеј“ во романскиот град Слобозија, кој се играше на земјени терени и за награден фонд од 40.000 долари, Лина Ѓорческа го освои својот 15. турнир во 39. финале во поединечна конкуренција во кариерата.
„Трофејот има нова кралица! 👑
Финале од бајките, битка до крај, тениско шоу кое Слобозија ќе го памети долго време. 🎾✨
Какви топки, сервиси и емоции, денес доживеавме чиста магија. 🎇
👉 Лина Ѓорческа е шампион на ‘Напарис трофеј 2025’!“, објави организаторот на својата официјална страница на Фејсбук за драматичните 2:16 часа игра на главниот терен.
Романката го доби првиот сет со 6-3, Ѓорческа возврати идентично, а во решавачкиот сет прво 31-годишната тетовка направи брејк за водство од 4-2, па противничката врати за 4-4, за најдобрата македонска тенисерка со нов брејк да стигне до победата со искористување на првата меч-топка!
Ѓорческа беше трета носителка на турнирот како 282. на ВТА-листата во сингл и со „трета – среќа“ стигна до својот прв трофеј годинава по двете загубени финалиња едноподруго во Куршумлиска Бања. Тоа ќе ѝ донесе нов скок на ВТА-ранкингот, на кој највисоко котираше на 12 јуни 2017 година, кога беше 170. тенисерка во светот.