Машката одбојкарска репрезентација на Македонија го совлада Б-тимот на Бугарија со 3:0, по сетови 26-24, 25-23 и 25-16, во првиот од двата контролни натпревара во салата „Левски“ во Софија, а избраниците на селекторот Јошко Миленковски го добија и договорениот дополнителен сет со 25-22.
Првата проверка на сработеното на десетдневните подготовки во Маврово се случи зад затворени врати, а така ќе биде и во реваншот утре напладне.
Капитенот Никола Ѓоргиев беше најдобар во македонскиот состав со 17 поени, Филип Савовски запиша 11, Александар Љафтов 10, а Владо Милев, Филип Маџунков и Стојан Илиев по 7.
Двомечот со тимот предводен од Франческо Моло е во функција на августовската втора половина од квалификациите за Европското првенство и возвратните средби со Грција во Атина и со Азербејџан во Скопје.