Европската комисија одлучи да не прави никакви отстапки во примената на новиот Систем за влез и излез (ЕЕС), и покрај растечките барања од авиокомпаниите и аеродромските оператори за привремено олеснување на контролите поради очекуваниот голем притисок на патници во текот на летната туристичка сезона.
Оваа одлука директно се однесува и на граѓаните на Северна Македонија. При секое патување во земјите од Шенген-зоната, тие ќе мораат да поминуваат низ задолжителни биометриски проверки – скенирање на патната исправа, фотографирање на лицето и земање отпечатоци од прсти при првата регистрација, како и електронско регистрирање на секое влегување и излегување.
Воздухопловната индустрија предлагаше на најоптоварените аеродроми и гранични премини привремено да се намалат проверките за да се избегнат долги редици и доцнења. Сепак, Европската комисија смета дека таквиот пристап би создал различни правила меѓу земјите членки и би ја нарушил униформната примена на системот.
Правилата за престој остануваат непроменети – дозволени се 90 дена во период од 180 дена. Од Меѓународната асоцијација за воздушен транспорт (IATA) предупредуваат дека новите проверки веќе предизвикуваат значителни доцнења и пропуштени летови на повеќе европски аеродроми, додека „Рајанер“ изрази загриженост за состојбата на аеродромите во популарните туристички дестинации.
Според податоците на Европската комисија, преку новиот систем досега се регистрирани околу 110 милиони влезови и излези, а на над 44.500 лица им е одбиен влез во Шенген зоната поради прекршување на правилата за престој или поради употреба на фалсификувани документи.
Градските и државните власти, како и самата Комисија, им препорачуваат на патниците од Македонија да планираат дополнително време за граничните контроли и да пристигнуваат значително порано на аеродромите, особено во периодите на засилен туристички сообраќај.