Со тоа, Хаг станува првиот сојузник на НАТО што се приклучува кон новиот механизам за вооружување на Киев со американски системи за оружје, пренесе Ројтерс
„Како прв сојузник на НАТО, Холандија ќе испорача пакет од 500 милиони евра американски системи за оружје, вклучувајќи делови и ракети за системите „Патриот“, напиша Брекелманс на платформата X.
Новиот механизам, наречен „Листа на приоритетни барања за Украина од НАТО“ (PURL), беше предложен од САД и има за цел да финансира американско оружје за Украина од европските членки на Алијансата и Канада.
Секоја земја ќе може да преземе пакет вреден околу 500 милиони долари, прилагоден на специфичните потреби на Киев.
Генералниот секретар на НАТО, Марк Руте, кој до неодамна беше премиер на Холандија, ја поздрави одлуката и рече дека испратил писма до сите сојузници во кои ги повикува да се приклучат на иницијативата. „Ова е прашање на итна помош за Украина во нејзината борба против руската агресија“, рече тој.
Според американскиот амбасадор во НАТО, Метју Витакер, „се очекува уште многу земји да го објават своето учество во наредните недели“.
Тој рече дека испораките според новата шема би можеле да започнат многу наскоро, дури и во рок од неколку недели.
„Холанѓаните се само првите од многуте“, нагласи Витакер во интервју за Ројтерс од седиштето на НАТО во Брисел.
Механизмот ќе го координира Врховниот командант на сојузничките сили на НАТО за Европа, генерал Алексис Гринкевич, кој ќе одобри пакети системи за воздушна одбрана, муниција и друга критична опрема од американските залихи за брза испорака.
Украинскиот претседател Володимир Зеленски ѝ се заблагодари на Холандија и рече дека „Украина, а со неа и цела Европа, ќе биде подобро заштитена од рускиот терор“. Тој го опиша холандскиот придонес како „значајно зајакнување на воздушниот одбранбен штит на Украина“.
Механизмот следи по изјавата на претседателот Доналд Трамп од минатиот месец дека САД ќе обезбедат оружје за Украина, но платено од европските сојузници. Сепак, досега недостасуваа детали за спроведувањето на оваа иницијатива. Новата програма на НАТО ја пополнува оваа празнина и воведува нов модел на колективна помош.
