Во турската престолнина Анкара денеска почнува дводневниот самит на НАТО, на кој ќе учествува и претседателката Гордана Силјановска-Давкова.
Претседателката утре ќе учествува на Состанокот на Северноатлантскиот совет на ниво на шефови на држави и влади, кој ќе се одржи во претседателскиот комплекс „Бештепе“. Таа ја предводи македонската делегација, во чиј состав се министерот за одбрана Владо Мисајловски, министерот за надворешни работи и надворешна трговија Тимчо Муцунски, како и началникот на Генералштабот на Армијата, генерал-мајор Сашко Лафчиски.
Покрај учеството на состанокот, македонската претседателка ќе има и повеќе билатерални средби. Активностите почнуваат вечерва со свечена вечера приредена од претседателот на Турција, Реџеп Таип Ердоган, во чест на шефовите на држави и влади.
На самитот ќе присуствуваат лидерите од 32-те земји-членки на НАТО, вклучително американскиот претседател Доналд Трамп, францускиот претседател Емануел Макрон, британскиот премиер Кир Стармер, германскиот канцелар Фридрих Мерц и други.
Самитот ќе се фокусира на спроведување на одлуките за зголемување на инвестициите во одбраната, зајакнување на капацитетите за одвраќање и одбрана, како и на идните стратешки цели на Алијансата. Ќе се разговара и за заканите и предизвиците со кои се соочува евроатлантскиот регион, вклучително и војната во Украина.
На крајот на самитот се очекува усвојување на завршна декларација. Според нацртот, сојузниците ќе ја потврдат „непоколебливата посветеност“ на колективната одбрана според членот 5 од Северноатлантскиот договор.
На маргините на самитот ќе се одржи и Форум на одбранбената индустрија на НАТО, на кој ќе учествува министерот за одбрана Владо Мисајловски.