Според висок кинески функционер и американски медиуми, Кина и САД се приближија кон решение за спорот околу царините, пренесува ДПА.
Двете страни постигнаа прелиминарен договор, изјави Ли Ченгганг, заменик-министер за трговија на Кина, по преговорите со американската делегација. Договорот мора да помине низ внатрешни процедури за одобрување од двете страни, додаде Ли, без да открие повеќе детали.
„Волстрит џурнал“ го цитира американскиот секретар за финансии Скот Бесент, кој изјави дека е воспоставена „успешна рамка“ пред планираната средба меѓу американскиот претседател Доналд Трамп и кинескиот претседател Си Џинпинг во Јужна Кореја во четврток. Останува нејасно дали лидерите ќе објават формално решавање на трговскиот спор, особено што времето е ограничено – дополнителните царини од Трамп треба да стапат во сила на 1 ноември.
За време на викендов, Кина и САД ја одржаа петтата рунда трговски разговори во Малезија, со цел да го решат повеќемесечниот конфликт. Фокусот беше на повеќе теми, вклучително кинеската контрола на извозот на ретки минерали и метали, како и американските царини за увоз од Кина. Според Бесент, рамката вклучува одложување на кинеските извозни контроли за ретки земји и избегнување на новите 100% американски царини, заедно со договори за борба против фентанил и зголемени кинески набавки на американски земјоделски производи.