Францускиот претседател Емануел Макрон денеска категорично ја отфрли можноста за поднесување оставка, нагласувајќи дека ќе остане на функцијата за да обезбеди континуитет и стабилност во земјата. Ова доаѓа во време на сериозна политичка криза, најтешка во Франција во последните децении, со зголемени притисоци од опозицијата која бара негово повлекување.
„Никогаш не заборавајте дека мандатот што го добивме од францускиот народ е да служиме и да одговараме на прашањата на обичните граѓани, како и да го гарантираме суверенитетот на Франција,“ изјави Макрон пред новинарите во Египет, кратко по повторното именување на Себастијан Лекорну за премиер.
„Тоа е единственото што има значење. Сè друго е работа на владата… Јас ќе продолжам да ја гарантирам стабилноста,“ додаде Макрон, чиј втор мандат истекува во 2027 година.