Германскиот канцелар Фридрих Мерц го обвини рускиот претседател Владимир Путин дека води „хибридна војна“ против Германија, нагласувајќи дека оваа стратегија вклучува информативни кампањи и други форми на притисок кои го загрозуваат европскиот политички поредок. Во интервјуто за германската телевизија ntv, Мерц објасни дека Путин не само што води воена агресија против Украина, туку таа е насочена и против Западна Европа, вклучително и Германија, со цел да се дестабилизира либералниот поредок и отворените општества.
Според Мерц, рускиот лидер сака да го „преврти наопаку“ европскиот систем, па затоа Берлин останува цврсто посветен на поддршката за Украина – не само од солидарност, туку и за да се заштити сопствените интереси. „Тоа е во наш интерес да го браниме нашиот политички поредок“, рече тој, додавајќи дека секој обид за дијалог со Путин обично завршува со ескалација на нападите врз Украина, како што се бомбардирањата на цивилни цели.
Канцеларот се осврна и на сè почестите инциденти со беспилотни летала во Германија и Европа, кои ги смета за дел од руската стратегија за заплашување и всаѓање страв. „Ја знаеме заканата. Нема да бидеме заплашени и ќе се одбраниме ефикасно“, порача Мерц, уверувајќи дека Германија е подготвена да одговори на овие хибридни закани без да попушти пред притисоците.
Мерц спомна и жестока дискусија со унгарскиот премиер Виктор Орбан на неодамнешниот состанок на ЕУ во Копенхаген, каде Орбан ги обвинил европските партнери дека не сакаат преговори со Русија. Канцеларот му одговорил потсетувајќи го Орбан на неговата посета на Киев во јули 2024-та, како претседател на Советот на ЕУ, и на последователната средба со Путин во Москва – по што следело бомбардирање на детска болница во Украина. Оваа размена ја истакнува поделбата во ЕУ околу руската агресија, но Мерц останува цврст во ставот дека единството е клучно за одбрана.