Количината на нафта што минува низ Ормуската теснина се зголемува и моментално е помеѓу 65 и 70 проценти од нивоата пред војната, изјавија од аналитичката компанија на „Вортекс“ за германската новинска агенција ДПА. Бројката се однесува и на течниот природен гас (LPG) и дериватите како што е бензинот. Во споредба со периодот пред војната, околу 80 проценти од непреработената сурова нафта и гасните кондензати сега минуваат низ теснецот, соопшти „Вортекс“.
Компанијата соопшти дека просечно 11,2 милиони барели нафта дневно минувале низ теснецот за една недела, како што претходно објави „Волстрит џурнал“. Аналитичарката Амена Бакр од „Кплер“ исто така забележа зголемување на извозот на нафта од Персискиот Залив.
Податоците од „Кплер“ покажаа дека големите производители на нафта на Блискиот Исток извезле 12,8 милиони барели нафта дневно во септември, во споредба со 18,8 милиони во февруари, напиша таа на платформата за социјални медиуми X.
Сообраќајот преку еден од најважните енергетски патишта во светот нагло се намали од почетокот на нападите на САД и Израел врз Иран на 28 февруари. Иранските закани и напади речиси го запреа нормалниот сообраќај на танкери, поттикнувајќи ги земјите од Персискиот Залив да користат алтернативни нафтоводи и други извозни правци.
„Вортекс“ дел од сегашното закрепнување го припишува на проширувањето на таканаречената флота на шатлови. Мал број танкери под заштита на американската морнарица минуваат низ Ормутскиот теснец, собираат нафта од терминалите во Персискиот Залив, а потоа ја префрлаат до поголеми танкери што чекаат надвор од теснецот.