Претседателот на САД, Доналд Трамп, изјави дека ќе го продолжи примирјето со Иран сè додека Техеран не поднесе предлог за траен крај на конфликтот.
- „Врз основа на фактот дека иранската влада е сериозно поделена, што не е неочекувано, и на барање на фелдмаршалот Асим Мунир и премиерот на Пакистан, Шехбаз Шариф, од нас е побарано да го одложиме нападот врз Иран, сè додека нивните лидери и претставници не излезат со унифициран предлог“, напиша Трамп на социјалната мрежа Трут соушл.
Тој додаде дека ѝ наредил на американската војска „да ја продолжи блокадата и во сите други аспекти да остане подготвена и способна“.
Двонеделното примирјето требаше да истече во следните неколку часа.
- „Ќе биде продолжено сè додека не се достави нивниот предлог и сè додека не се завршат преговорите, на еден или друг начин“, додаде Трамп.
Ова е голем пресврт во споредба со неговите претходни изјави денес. Тој претходно денес изјави дека не сака да го продолжи прекинот на огнот и смета дека продолжувањето на бомбардирањето е подобра опција. И покрај најавите дека американска и иранска делегација ќе допатуваат во Исламабад на втор круг преговори, тие не пристигнаа во Пакистан.
Си-ен-ен повикувајќи се на неименувани извори објави дека засега е одложено патувањето на американскиот потпретседател Џеј Ди Венс за Исламабад. Изворите тврдат дека Венс пристигнал во Белата куќа на состанок за следните чекори на американската администрација, на кој присуствуваат и државниот секретар и министерот за одбрана, Марко Рубио и Питер Хегсет.
Претходно, портпаролот на иранското Министерство за надворешни работи, Есмил Багаи за државната телевизија ИРИБ изјави дека сè уште не е донесена конечна одлука дали Иран ќе учествува на мировните преговори со САД.
- „Причината е јасна, ова не е прашање на неодлучност. Се соочуваме со контродикторни пораки, недоследно однесување и неприфатливи потези од страна на САД“, наведе Багаи.
Тој потенцира дека дипломатскиот процес мора да биде ориентиран кон резултати и кога Иран ќе процени дека условите се исполнети ќе ја донесе потребната одлука. И двете страни тврдат дека се подготвени за продолжување на војната.