Рускиот претседател Владимир Путин предложи директни мировни преговори со Украина на 15 мај во Истанбул.
Путин се обрати до јавноста неколку часа по завршувањето на самопрогласената тридневна пауза во нападите врз Украина.
Тој рече дека Русија предлага директни разговори со Украина во Истанбул во четврток, 15 мај, во обид да се „отстранат корените на конфликтот“ и „да се постигне враќање на долгорочен, траен мир“.
Вчера, германскиот канцелар Фридрих Мерц, францускиот претседател Емануел Макрон, британскиот премиер Кир Стармер и полскиот премиер Доналд Туск беа во Киев каде разговараа со Зеленски и телефонски со американскиот претседател Доналд Трамп.
Тие му поставија ултиматум на Путин и го замолија да се согласи на 30-дневен прекин на огнот што ќе започне во понеделник, 12 мај.
Доколку одбие, рекоа тие, западните земји ќе испратат уште повеќе оружје во Украина и ќе воведат нови „масовни“ санкции врз Русија.
„Русија не ги прекина преговорите во 2022 година. Тоа беше Киев. Сепак, ние предлагаме Киев да ги продолжи директните преговори без никакви предуслови“, рече Путин, осврнувајќи се на неуспешните преговори кратко по руската инвазија.
„Им нудиме на властите во Киев да ги продолжат преговорите уште во четврток, во Истанбул“, рече Путин.
„Нашиот предлог, како што велат, е на маса, одлуката сега е на украинските власти и нивните старатели, кои се чини дека се водат од своите лични политички амбиции, а не од интересите на својот народ.“
„Ние сме посветени на сериозни преговори со Украина. Нивната цел е да се елиминираат коренските причини за конфликтот, да се воспостави долгорочен, траен мир од историска перспектива“, рече Путин.
Во четврток, Путин еднострано прогласи прекин на огнот во војната во Украина, кој истече на полноќ.