Претседателот Доналд Трамп изјави дека САД го продолжат прекинот на огнот со Иран на барање на Пакистан и ќе продолжат со блокадата на иранските пристаништа, објави Ројтерс.
„Врз основа на фактот дека Владата на Иран е сериозно поделена, не неочекувано и, по барање на фелдмаршалот Асим Мунир и премиерот Шехбаз Шариф од Пакистан, од нас е побарано да го одложиме нашиот напад врз земјата Иран сè додека нивните лидери и претставници не можат да излезат со унифициран предлог“, напиша Трамп на неговата социјална мрежа.
Ѝ наредив на нашата војска да ја продолжи блокадата и во сите други аспекти да остане во состојба на готовност. Затоа, тие ќе го продолжат прекинот на огнот сè додека не се презентира нивната понуда и разговорите не се завршат на еден или друг начин, изјави дополнително Трамп.
Техеран ги отфрла разговорите кои водат кон негова капитулација.
Пакистанскиот премиер Шехбаз Шариф во средата му се заблагодари на Трамп за прифаќањето на барањето на земјата за продолжување на прекинот на огнот во американско-израелската војна против Иран за да се овозможи тековните дипломатски напори да го продолжат својот тек.
„Искрено се надевам дека двете страни ќе продолжат да го почитуваат прекинот на огнот и ќе можат да склучат сеопфатен „мировен договор“ за време на втората рунда разговори закажани во Исламабад за конечно завршување на конфликтот“, напиша Шариф во X.
Но, само неколку часа откако Трамп објави продолжување на прекинот на огнот со Иран за да му даде на Техеран повеќе време за преговори, Трамп објави серија драматични пораки на својата платформа Truth Social, тврдејќи дека Иран се соочува со финансиски колапс поради американската поморска блокада.
Според Трамп, Техеран очајно сака да го отвори Ормутскиот теснец бидејќи губи 500 милиони долари дневно поради блокадата.
„Иран се урива финансиски! Тие сакаат Ормутскиот теснец веднаш да се отвори – гладуваат за пари! Губат 500 милиони долари дневно. Војската и полицијата се жалат дека не им се плаќа. СОС!!!“, напиша Трамп.
Во друг пост, Трамп тврди дека иранското раководство всушност не сака теснецот да биде затворен, и покрај нивните закани, туку сака да биде отворен токму поради огромните приходи.
„Тие велат дека сакаат да биде затворен само затоа што јас целосно го БЛОКИРАВ, па затоа само сакаат да „го спасат образот““, рече американскиот претседател.
