Државниот секретар Марко Рубио им кажа на европските сојузници дека САД сакаат да биде постигнат мировен договор пред да се согласат на какви било безбедносни гаранции за Украина, дознава Политико.
Украинските власти ги сметаат западните безбедносни гаранции како камен-темелник за каков било изводлив договор со Русија, иако членките на НАТО се мачат да сфатат како да ја поддржат земјата погодена од војната, воено или со разузнавачка поддршка.
Трамп изјави дека нема да го покани лидерот на Украина во Белата куќа додека не се потпише договор.
Рубио, исто така, им кажа на европските сојузници дека безбедносните гаранции за Украина се приоритет за администрацијата и прашање одвоено од другите точки на дискусија за кои веќе е договорено, а САД сакаат целиот пакет да се заврши брзо.
Според Политико, американскиот државен секретар Марко Рубио го истакнал овој став за време на серија состаноци со европски дипломати во текот на изминатата недела. Неколку од нив потврдуваат дека Рубио јасно го формулирал редоследот што го претпочита Вашингтон: прво мировен договор – потоа гаранции.
Според дипломатски извори, Рубио имал интензивни телефонски разговори со европските сојузници, уверувајќи ги дека претседателот Доналд Трамп „ќе постигне договор што ќе ја обезбеди долгорочната безбедност на Украина“.
Сепак, останува нејасно како точно ќе изгледаат гаранциите на САД, бидејќи земјите од НАТО сè уште не биле во можност да утврдат механизам за нивно обезбедување, забележува Политико.
За Киев, токму безбедносните гаранции се клучен елемент на секој иден договор со Москва.