„Ако беа искрени во намерата да нè примат, немаше да чекаме 20 години“, рече ѓефот на унгарската дипломатија Пертер Сијарто на заедничката прес-конференција со министерот за надворешни работи на Македонија, Тимчо Муцунски.
Тој додаде дека иако Бугарија отворено го попречува европскиот пат на Македонија, тоа не е единствената пречка.
„Кога доаѓаат кај вас, зборуваат убаво. Но, кога сме зад затворени врати, веднаш се појавуваат аргументи против проширувањето“, рече Сијарто.
„Ситуацијата е многу потешка – вистинскиот проблем е што државите кои искрено го поддржуваат проширувањето се малцинство во ЕУ“, нагласи Сијарто.
Унгарскиот министер истакна дека Будимпешта вложува напори за забрзување на процесот на интеграција, особено за време на унгарското претседателство со ЕУ, но постојано се соочува со отпор од земји кои, според него, само декларативно го поддржуваат проширувањето.
„Државите кои искрено го поддржуваат проширувањето се малцинство во ЕУ“, рече Сијарто.
Сијарто го критикуваше и односот на Брисел кон Украина, укажувајќи дека нејзиното брзо зачленување се турка по политичка линија, додека земјите од Западен Балкан со децении чекаат.
„Не мислам дека некој со здрав разум може да каже дека Украина е во подобра општа состојба од која било земја од Западен Балкан“, додаде тој.
Според него, евентуалното брзо вклучување на Украина во ЕУ може да предизвика сериозни економски и безбедносни ризици, меѓу кои и влез на организиран криминал, увоз на неквалитетни производи, како и злоупотреба на европските фондови.
Унгарскиот министер посочи и на проблемот со унгарското малцинство во Украина, за кое, според него, постојано се кршат основните човекови права, што е спротивно на европските вредности.
„Додека се ограничуваат правата на малцинствата, се зборува за европски вредности. Тоа е неприфатливо“, рече Сијарто, нагласувајќи дека Унгарија останува цврст поддржувач на интеграцијата на земјите од Западен Балкан, но не и на брзото зачленување на Украина.