Врховниот суд на Белгија ја прогласи за неприфатлива кривичната тужба против претседателката на Европската комисија, Урсула фон дер Лајен, поврзана со набавката на вакцини против Ковид-19 од американската компанија „Фајзер“. Оваа пресуда доаѓа по жалбата на одлуката на Судот во Лиеж, кој во 2023 година ја отфрли тужбата поднесена од поранешниот белгиски лобист Фредерик Балдан.
Балдан ја обвини Фон дер Лајен за злоупотреба на службената положба, уништување докази, корупција и судир на интереси во врска со договорите за набавка на вакцини за време на пандемијата на коронавирусот. Кон тужбата првично се приклучија неколку странки, вклучувајќи ги Унгарија, Полска, здружението „Нашиот добар закон“, белгиската партија Вивант и неколку граѓани.
Адвокатот на Фон дер Лајен, Адриен Масе, ја поздрави пресудата на белгискиот Врховен суд, оценувајќи ја како „добра одлука“.
Со конечната одлука на Врховниот суд, тригодишната судска постапка против претседателката на Европската комисија е завршена.