Политичари од двете партии во САД, како и лидери од Европа, Блискиот Исток и други делови од светот, остро го осудија вооружениот инцидент што се случи синоќа за време на гала-вечерата на Асоцијацијата на дописници од Белата куќа во хотелот „Вашингтон Хилтон“.
Повеќето од нив порачаа дека политичкото насилство нема место во демократијата и изразија олеснување што американскиот претседател Доналд Трамп и сите присутни останале неповредени.
Претседателот на Претставничкиот дом, Мајк Џонсон, кој беше на настанот со сопругата, изјави дека двајцата „се молат за земјата“. Лидерот на демократите во Претставничкиот дом, Хаким Џефрис, порача дека „насилството и хаосот во Америка мора да престанат“.
Градоначалничката на Вашингтон, Мјуриел Баузер, им се заблагодари на припадниците на безбедносните служби за брзата и професионална реакција.
Вејџија Џанг, дописничка на Си-Би-Ес Њуз и претседателка на Асоцијацијата на дописници од Белата куќа, која седела до претседателот Трамп, истакна дека во време на криза новинарите „трчаат кон кризата, а не бегаме од неа“.
Меѓународните реакции беа брзи и остри. Британскиот премиер Кир Стармер изјави дека е „шокиран од сцените на насилство“ и дека „секој напад врз демократските институции или врз слободата на медиумите мора најостро да се осуди“.
Претседателката на Европската комисија, Урсула фон дер Лајен, изрази олеснување што сите присутни се безбедни и им се заблагодари на безбедносните служби за брзата реакција, порачувајќи дека „насилството нема место во политиката, никогаш“.
Шефицата на европската дипломатија, Каја Калас, истакна дека „политичкото насилство нема место во демократијата“ и дека настан кој треба да ја слави слободата на медиумите никогаш не смее да стане сцена на страв.
Израелскиот премиер Бенјамин Нетанјаху изјави дека тој и сопругата биле „шокирани од обидот за атентат“ врз Трамп, додека индискиот премиер Нарендра Моди порача дека политичкото насилство „нема место во демократијата и мора недвосмислено да се осуди“.
Осуди и изрази на поддршка пристигнаа и од Канада, Австралија, Мексико, Пакистан, Либан, Шпанија и Венецуела.