Претседателот на САД, Доналд Трамп, се закани дека ќе нападне ирански мостови и електрани следната недела ако Техеран не се врати на преговарачка маса. Трамп ги даде овие забелешки во интервју за Фокс њуз, емитувано додека САД и Иран разменуваа напади четврти ден по ред.
Претседателот на САД претходно ги напушти плановите за воведување царина од 20 проценти на целиот товарен превоз преку Ормутскиот теснец, но во исто време повторно воведе поморска блокада на иранските пристаништа.
„Следната недела ќе стане многу лошо за нив. Ќе ги уништиме сите нивни електрани. Ќе ги уништиме сите нивни мостови ако не седнат на преговарачка маса и не почнат да преговараат“, рече Трамп, повторувајќи ги претходните закани што беа осудени од претставници на Обединетите нации во тоа време.
Откако Трамп се закани во април дека ќе бомбардира цивилна инфраструктура во Иран, вклучувајќи мостови и електрани, високиот комесар на ОН за човекови права, Фолкер Турк, рече: „Според меѓународното право, намерните напади врз цивили и цивилна инфраструктура претставуваат воено злосторство“.
Женевските конвенции од 1949 година, кои го регулираат хуманитарното право во војна, забрануваат напади врз објекти кои се сметаат за витални за цивилното население.
„Ќе ги оставам енергетските цели за на крај, но на крајот ќе ги постигнеме“, рече Трамп во „Специјален извештај со Брет Бајер“, кој се емитуваше синоќа.
Тој додаде дека американските преговарачи вчера ја пренеле пораката до иранската страна: „Подобро да постигнете договор или нема да ви остане ништо“.
Ескалацијата на воената реторика дојде откако Трамп објави дека ќе ја замени таксата од 20 проценти со која претходно се закани за премин низ Ормутскиот теснец со „огромни“ трговски и инвестициски договори со земјите од Персискиот Залив. Неговата објава дојде само неколку часа пред САД повторно да воведат блокада на иранските пристаништа.
Обновените напади меѓу САД и Иран ги зголемија цените на нафтата, додека сообраќајот на танкери низ Ормутскиот теснец е доведен до речиси целосен застој.
Централната команда на САД (CENTCOM) доцна синоќа соопшти дека нејзините сили „започнале дополнителен бран напади врз Иран за да продолжат да ги уништуваат капацитетите на Иран што се користат за напад врз комерцијални бродoви“
Американскиот адмирал Бред Купер во соопштението изјави дека Иран „намерно ги таргетирал цивилите“ во регионот со напад врз седум трговски бродови, при што „речиси десетина цивилни членови на екипажот се убиени, исчезнати или повредени“.