Американските научници Мери Брунков, Фред Рамсдел и Шимон Сакагучи се добитници на Нобеловата награда за физиологија или медицина за 2025 година, објави „Ројтерс“.
Одликувањето им е доделено за откритијата во областа на периферната имунолошка толеранција, кои отвораат можности за потенцијални нови третмани за автоимуни болести и рак.
Добитниците во областа на медицината ги избира Нобеловиот комитет од Институтот Каролинска во Шведска и добиваат награда од 11 милиони шведски круни (1,2 милиони долари), како и златен медал што го доделува кралот на Шведска.
Брунков е виш програмски менаџер во Институтот за системска биологија во Сиетл, а Рамсдел е научен советник во Сонома Биотерапевтикс во Сан Франциско, чиј ко-основач е Сакагучи кој е и професор на Универзитетот во Осака, Јапонија.
„Овие откритија поставија темели за ново поле на истражување и го поттикнаа развојот на нови третмани, на пример за рак и автоимуни болести“, се вели во соопштението за доделената награда.
Нобеловите награди се основани од наследството на Швеѓанецот Алфред Нобел – пронаоѓачот на динамитот и богат бизнисмен.
Тие се доделуваат од 1901 година за исклучителен придонес во науката, литературата и мирот…
Со доделување на наградата за медицина, согласно со традицијата, започна доделувањето на овогодишните Нобелови награди, најпрестижните признанија во областа на науката, литературата, мирот и економијата, а другите ќе бидат објавени во наредните денови.