Израел би можел да се соочи со граѓански конфликт или, во најекстремно сценарио, со распад на државата доколку продолжат да се продлабочуваат внатрешните политички, економски и општествени поделби. Ова се наведува во наводна доверлива проценка на ЦИА за која објави медиумот „Drop Site News“.
Медиумот се повикува на два американски извора кои ја опишале содржината на документот од август, насловен „Fracture From Within“ – „Пукнатина однатре“. ЦИА не одговорила на барањето на медиумот за коментар, а документот не е јавно објавен.
Според „Drop Site“, анализата ја изработиле експерти од „Red Cell“, единица во рамките на ЦИА чија задача е да развива алтернативни анализи, да ги преиспитува доминантните претпоставки и да разгледува сценарија што вообичаените проценки би можеле да ги превидат.
Во проценката, според изворите, се разгледува комбинација од повеќе притисоци врз израелското општество во пресрет на парламентарните избори закажани за 27 октомври. Меѓу нив се економските проблеми и високите воени трошоци, враќањето на голем број вооружени ветерани од повеќегодишните борби, незадоволството поради ослободувањето на ултраортодоксните мажи од воена служба, насилството на доселениците на окупираниот Западен Брег и политичката криза околу премиерот Бенјамин Нетанјаху.
Еден од изворите на „Drop Site“ тврди дека авторите на документот се експерти за Израел и дека анализата не треба да се разбере како предвидување дека граѓанска војна неизбежно ќе се случи, туку како предупредување дека постојат услови во кои политичката конфронтација би можела да прерасне во посериозен внатрешен судир.
Прашањето за задолжителната воена служба е наведено како една од важните линии на поделба. Ултраортодоксните мажи со години имаат широки ослободувања од воената обврска, додека резервистите во изминатите години повеќепати беа мобилизирани поради војните и воените операции. Паралелно со тоа, домаќинствата се соочуваат со зголемени животни трошоци, додека повеќегодишните воени операции дополнително го оптоваруваат државниот буџет.
Израел на 27 октомври треба да ги одржи првите парламентарни избори по нападот на Хамас од 7 октомври 2023 година и војните што следуваа во Газа, Либан и Иран. Нетанјаху повторно се кандидира, а анкетите покажуваат длабоко поделена политичка сцена и неизвесност околу можноста за формирање мнозинство од 61 пратеник.
Во наводната проценка на ЦИА се разгледува и меѓународната позиција на Израел. Според изворите, аналитичарите оценуваат дека слабеењето на поддршката во странство, вклучително и во САД, може дополнително да ги засили внатрешните економски и политички притисоци.
Документот, според „Drop Site“, разгледува и што би можело да се случи доколку кризата премине во отворен внатрешен конфликт. Меѓу сценаријата се повлекување на странски технолошки компании и експерти, дополнителен удар врз економијата, преиспитување на односите со Израел од страна на регионалните држави и можност Хамас или Хезболах да се обидат да искористат период на внатрешна нестабилност. Според изворите, во самиот документ експлицитно се користи терминот „граѓански конфликт“.
Сепак, објавените информации не значат дека ЦИА проценила дека граѓанска војна или распад на Израел сигурно ќе се случат. Станува збор за анализа на ризици и можни сценарија, чија содржина засега е позната единствено преку два извора цитирани од „Drop Site News“, без јавна потврда од американската разузнавачка агенција.