„Патриотите“ не ги спасија. Украинската воздушна одбрана не пресретна ниту една од деветте балистички ракети во текот на викендот, пишува „Вашингтон пост“.
Американскиот весник известува дека две од руските ракети биле насочени кон Киев, каде што се стационирани најмалку две единици за воздушна одбрана со американски системи „Патриот“.
Балистичките ракети станаа едно од најефикасните оружја во рускиот арсенал, особено против инфраструктурата.
„Украина доживува растечки недостиг од системи за противвоздушна одбрана ‘Патриот’, но новата администрација на Белата куќа не покажа желба да ги испорача“, констатира изданието.
За оваа тема проговори и Јуриј Игнат, претставник на Командата на Украинското воено воздухопловство, во интервју за француски „Ле Монд“.
„Русите најдоа начини за да се спротивстават на ‘Патриот’. Ракетите ‘Искандер’ изведуваат маневри за избегнување во последната фаза од нивниот лет, што го спречува ‘Патриот’ да ја пресмета својата траекторија. Покрај тоа, ‘Искандер’ може да исфрли мамки што можат да ги измамат ракетите ‘Патриот’“, објасни Игнат.
Според него, системите „Патриот“ лоцирани во близина на Киев не можат да обезбедат стопроцентна заштита од балистички ракети.
Неименувани извори претходно за „Ле Монд“ изјавија дека на Украина ѝ снемало ракети за своите противвоздушни батерии САМП-T испорачани од Италија и од Франција, а повеќе од една година не добила муниција за францускиот систем за воздушна одбрана „Кротал“.