Министерството за финансии до Развојната банка ја префрли петтата транша од унгарскиот заем наменет за компаниите. Министерката за финансии Гордана Димитриеска-Кочоска на својот фејсбук-профил објави дека вредноста на оваа, нова, транша е 700,9 милиони денари, односно 11,3 милиони евра. Според соопштението од Министерството, средствата се префрлени од Буџетот, по добиено барање од Развојната банка и откако деловните банки ги одобриле проектите.
Досега се префрлени пет транши во вкупен износ од 171,1 милиони евра. Овие пари се обезбедени преку заем од унгарската Експорт-импорт банка, со цел да се пласираат средства по поволни услови за реализација на инвестиции во приватниот сектор.
Министерството информира дека искористеноста на оваа кредитна линија од страна на домашните компании досега изнесува 68 отсто.
Во Буџетот за 2025 година, за поддршка на домашната економија се проектирани вкупно 250 милиони евра.
Компаниите имаат пристап до кредити со рок на отплата до 15 години и грејс период до три години. Каматната стапка изнесува 1,95 проценти без дополнителни надоместоци за одобрување, управување и предвремена отплата на средствата. Максималниот износ на кредитот ќе биде до 10 милиони евра во денарска противвредност, а во целиот проект се вклучени сите 13 банки.
Договорот за заем со Унгарската експорт-импорт банка беше потпишан во октомври минатата година во Будимпешта. Кредитот е во висина од 500 милиони евра со каматна стапка од 3,25 отсто, со период на отплата од 15 години, односно вклучен грејс период од три години. Тие влегоа како средства во буџетот, од каде 250 милиони евра се насочени кон Развојната банка, а таа преку комерцијалните банки ќе ги пласира на приватниот сектор за инвестиции, а останатите 250 милиони евра се наменети за инфраструктурни проекти, односно за финансирање на проектите на општините.
Средствата станаа оперативни откако Владата на седница на 28 јануари годинава донесе одлука за нивно ставање на располагање на компаниите.