Во видео-обраќање од Овалната соба, американскиот претседател Доналд Трамп изрази тага и бес поради атентатот врз неговиот сојузник Чарли Кирк, кој беше убиен на 10 септември 2025 година на собир на Универзитетот во Јута, пред преку 3.000 луѓе. Властите соопштија дека осомничениот веројатно пукал од покрив на значително растојание.
– Исполнет сум со тага и гнев поради гнасниот атентат врз Чарли Кирк на универзитетскиот кампус во Јута. Тој инспирираше милиони луѓе и сите што го познаваа и сакаа вечерва се во шок. Ова е мрачен момент за Америка, рече Трамп во четириминутното видео објавено на социјалната мрежа Икс.
Тој го нарече Кирк „маченик за вистината и слободата“ и изрази сочувство до неговото семејство. Трамп го поврза атентатот со нападот врз него во Батлер, Пенсилванија, и други случаи на политичко насилство, тврдејќи дека радикално-левичарската реторика е одговорна за „тероризмот“ во земјата.
– Овој вид реторика е директно одговорен за тероризмот што го гледаме во нашата земја и мора да престане веднаш. Мојата администрација ќе ги пронајде сите оние што придонесоа за ова злосторство, рече тој.
Трамп истакна дека насилството е последица на демонизирањето на оние со спротивни ставови и вети дека неговата администрација ќе преземе мерки против сите инволвирани во политичкото насилство, вклучувајќи ги организациите што го финансираат и поддржуваат.
– Мојата администрација ќе ги пронајде сите оние што придонесоа за ова злосторство и за други политички насилства, вклучувајќи ги организациите што го финансираат и поддржуваат, како и оние што ги гонат нашите судии, службеници за спроведување на законот и сите други што воведуваат ред во нашата земја, додаде тој, најавувајќи поширок план за сузбивање на политичкото насилство.
https://x.com/realDonaldTrump/status/1965947311718269341