„Старлинк“, сателитската интернет услуга во сопственост на Илон Маск, претрпе глобален прекин на 15 септември. Компанијата го објави ова на својата официјална веб-страница.
Оваа услуга е од суштинско значење за болниците, училиштата и воените единици на фронтовите низ Украина.
„Старлинк е надвор од функција долж целата фронтова линија“, изјави Роберт „Маѓар“ Броди, главен командант на беспилотни летала во Украина, преку Телеграм, цитиран од Киев Индепендент.
Платформата „Даундектор“, која следи прекини во услугите, забележа десетици илјади пријави од корисници ширум светот, вклучително околу 40.000 од САД. Компанијата соопшти дека ја истражува причината за проблемот.
По речиси еден час, Броди објави дека поврзаноста „постепено се враќа“, но Starlink сè уште не потврди целосно обновување.
Ова е втор прекин во последните неколку месеци.
Starlink игра клучна улога во Украина, надоместувајќи ја оштетената комуникациска инфраструктура и обезбедувајќи врски за цивилите и војската.
Од почетокот на руската инвазија во 2022 година, Украина доби над 50.000 терминали на „Старлинк“, од кои Полска донираше околу 30.000, што претставува најголем придонес од една земја.
Зависноста на Украина од Starlink беше отежната поради тензии со Маск. Во јули 2023 година, тој нареди привремено исклучување на сателитското покривање над Херсон за време на украинската контраофанзива во 2022 година, што покрена прашања за влијанието на приватни лица врз критичните системи за одлучување.