Лоша состојбата со чистотата на македонската метропола. Си одат водоводџии, водоинсталатери, багерист, оператори на машини бидејќи платата во приватниот сектор е поголема, алармираат од ССМ. Вкупниот број колку работници заминале од комуналните претпријатија, дополнително ќе го обезбедат. Додека граѓаните се гушат во ѓубре и по неколку недели нема кој да ги собере кантите со смет, а за санирање на дефектите во водоводната мрежа се чека со денови – од Синдикатот алармираат дека состојбата во комуналните претпријатија е очајна. Ниските плати, нередовната исплата, немањето регрес за годишен одмор како и основна работна и заштитна опрема ги бркаат работниците од комуналните претпријатија во земјава.
Уште поалармантно е тоа што работничките права и платите ги добиваат благодарение на штрајкови и протести.
–Во ЈП Водовод и канализација Скопје во изминатите две и пол години, претпријатието по разни основи го напуштија некаде околу 280 вработени. И за жал морам да потенцирам дека поголемиот дел од нив, покрај оние кои ги исполнуваат условите за редовно пензионирање, го напуштија претпријатието поради ниските плати, изјави Стојанче Кашиковски, претседател на СУТКОЗ.
Во таа насока, рече тој, СУТКОЗ реализира двегодишен проект „Промовирање и зајакнување на социјалниот дијалог во секторот за води преку иновативни пристапи“, финансиран од Европската Унија, за зајакнување на социјалниот дијалог во секторот за води, во соработка со синдикатите од Бугарија, Италија, Малта и Организацијата на работодавачи на Македонија.