Со вклучување на околу 2.000 војници од 13 сојузнички земји на НАТО, денеска се започнува дводневната воена вежба „Непоколебливо пладне“, чија главна цел е да ги провери способностите на Алијансата за одржување на нуклеарното одвраќање.
Вежбата главно ќе се одвива на воздухопловната база „Фолкел“ во Холандија и над Северното Море, но ќе опфати и други локации низ Европа, вклучително и во Белгија, Данска и Велика Британија.
„Непоколебливо пладне“ е фокусирана на обука за ракување, транспорт и контрола на тактичкото нуклеарно оружје, со акцент на протоколите, комуникацијата и координацијата меѓу сојузниците, без да вклучува реално користење на оружје.
Според генералниот секретар на НАТО, Марк Руте, вежбата е клучна за зачувување на „кредибилно, безбедно и ефикасно“ нуклеарно одвраќање на Алијансата.
– Исто така, испраќаме јасен сигнал до секој потенцијален противник дека можеме и ќе ги заштитиме сите сојузници од сите закани, додаде Руте.
Во рамките на вежбата ќе учествуваат 71 авион, вклучително ловци Ф-35, танкер авиони за полнење и поддршка од Военото воздухопловство на САД, како и борбени авиони од други членки на НАТО, меѓу кои Полска и Финска.
Полковник Даниел Банч, раководител на Одделот за нуклеарни операции во НАТО, истакна дека приоритет ќе биде безбедноста на копнените нуклеарни инсталации, заедно со тестирање на опремата за електронско војување, извидување и разузнавање.
– Постојат секакви закани што мора да ги земеме предвид, бидејќи овие инсталации се меѓу најбезбедните во светот и бараат максимална безбедност, изјави Банч, додавајќи дека на вежбата ќе се посвети внимание и на се поголемиот број на регистрирани дронови на воените бази на НАТО