Да се види колку е часот не еднаш, туку неколку пати пред граѓаните да излезат од своите домови со кесите полни со смет. Оние кои фрлале ѓубре во контејнерите во ноќните часови во главниот град без оглед дали станува збор за физички или правни лица ќе мора да ја променат навиката. Почна да важи одлуката на Град Скопје за временско ограничување на фрлањето ѓубре, за да се стави ред на одлагањето отпад. Па така, физичките лица кои нема да ја почитуваат одлуката ќе бидат казнети со 50 евра, а правните од 1.300 до 1.800 евра.
Советот на Градот Скопје одлучи на овој начин да го спречи хаосот со отпадот во главниот град. Одлуката не се однесува на приватните канти за отпад пред домовите.
- „Одлуката стапи во сила со потписот на градоначалникот Ѓоргиевски, и предвидува забрана за фрлање било каков отпад во или околу јавните контејнери поставени на јавни површини“.
Градот Скопје располага со 40 инспектори, 11 комунални инспектори и 10 комунални редари. Прекршоците ќе се констатираат на лице место, а ако се забележат поголеми количини отпад или отпад кој не спаѓа во комунално ѓубре, ќе се вршат контроли и врз правните лица.“
Спроведувањето на забраната ќе го контролираат комунални инспектори кои ќе работат во три смени. Мерката е со цел да се спречат угостителските и деловните субјекти да ги полнат контејнерите што се наменети за домаќинствата и да придонесе за поорганизирано и навремено собирање на сметот низ градот.
Од Град Скопје велат дека работат на тоа, сите угостителски објекти ќе добијат посебни контејнери за одлагање на отпадот, како и посебен тарифник и јасно утврдени услови за одлагање на отпадот.