Во Демир Хисар вчера напладне се уапсени тројца државјани на Бугарија под сомнение за кражба и нелегално изнесување на предмети од македонското културно наследство.
Околу 11:50 часот на улицата „Вељко Влаховиќ“, полициски службеници од ОВР Демир Хисар привеле А.К. (44), К.К. (48) и В.Г. (50). Првите двајца биле во патнички „фолксваген голф“ со бугарски регистарски ознаки, додека третиот управувал комбе „пежо боксер“, исто така со бугарски таблици.
При прегледот на возилата пронајдена е поголема количина делови од традиционални македонски народни носии – везени елеци, појаси, накит и други елементи. Осомничените не можеле да обезбедат никаков доказ за потеклото на предметите.
Етнолог од Народниот музеј во Битола извршил стручна проценка и категорично утврдил дека станува збор за оригинални делови од македонски народни носии од XIX и почетокот на XX век, кои спаѓаат во категоријата културно наследство со посебен режим на заштита. Таквите предмети се забранети за промет и изнесување во странство без дозвола од Министерството за култура.
Тројцата Бугари се задржани во полициска станица. По целосно документирање на случајот и во координација со јавниот обвинител, против нив ќе биде поднесена кривична пријава за „кражба“ и „изнесување во странство на добра под привремена заштита или културно наследство или природни реткости“ по член 262 и член 267 од Кривичниот законик.