Поранешниот македонски пратеник, министер за земјоделство, градоначалник на Кисела Вода и амбасадор во Софија, Марјан Ѓорчев, смета дека Македонија ѝ дала на Бугарија фер предлог за уставни измени со одложено дејство.
„Една од шансите што ја даде нашиот премиер Христијан Мицкоски во овие година и пол на власт беше предлогот што сигурно би бил поддржан во Собранието дури и од опозицијата Бугарите да бидат внесени во Уставот со одложено дејство. Тоа беше добар предлог и Бугарите би требало да го прифатат, зошто имаат извесност дека ќе бидат внесени во Уставот пред да влеземе во Европската унија. Дел од нашиот суверенитет ќе дадеме на Брисел и на ЕУ и тогаш навистина во делот на човековите права би значело Бугарите да бидат сигурни дека ќе ги имаат сите привилегии што ги бараат во овој момент, а ние не можеме да го испорачаме тоа. Нашата понуда беше многу јасна, многу чиста, многу концизна и принципиелна. Ние сме подготвени тоа да го направиме во договор во македонскиот политички систем со опозицијата, со науката, со Академијата и да отпочнеме еден процес на подобрување на односите со Бугарија, да им објасниме дека ние немаме ништо против македонските граѓани со бугарска самосвест, коишто имаат свои клубови, свои здруженија, своја политичка партија, сето тоа што го имаме како уставна придобивка за малцинствата во Македонија. Така што мислам дека таа понуда беше многу фер, многу коректна и Европската унија тоа го разгледува – дека Македонија е подготвена“, изјави Ѓорчев за Сител ТВ.