Во судир меѓу два камиона на автопат во Италија загина македонски државјанин од Тетово, роден во Хрватска, објави порталот на албански јазик „Журнал“.
Станува збор за 54-годишниот возач Гзим Даути, кој го загуби животот по ударот на едниот камион во задниот дел на другиот вчера околу 13 часот на 186. километар од автопатот А21 помеѓу Пјаченца и Кремона, во близина на Кастелветро, во областа Ла Вила.
Веднаш по судирот, интервенирале спасувачки екипи од две амбулантни возила и од хеликоптерот за итни случаи од Парма. На местото на настанот пристигнале и пожарникари од Кремона и од Фиоренцуола за да го извлечат Даути, кој бил заробен во возачката кабина.
И покрај обемните напори за реанимација, возачот на камионот починал на местото на настанот.
Сообраќајната полиција во Кремона, која има надлежност над овој дел од патот, ја реконструира динамиката на судирот.