Најдобрите македонски ракометари од синоќа се во Данска, кадешто во Силкеборг ги почнаа завршните подготовки за претстојното Европско првенство, на кое ќе стартуваат на 16 јануари од 20:30 часот против домаќинот, кој е актуелен светски и олимписки шампион и најголем фаворит за европското злато.
„Нашиот фокус во моментов е на првиот натпревар со Данска. Тие се фаворити, а ние ќе го дадеме нашиот максимум и наша цел е да извојуваме добар резултат. Имаме уште три дена за да се подготвиме како тактички, така и колку што може подобро физички. Ќе пробаме да го следиме нивниот ритам и се надевам на позитивен резултат“, изјави средниот бек Марко Митев, стрелец на голот за реми 29:29 со Швајцарија во саботата на „Жолтиот куп“ во Винтертур.
Во второто коло од групата на 18 јануари „црвено-жолтите“ ќе играат со Португалија и два дена подоцна со Романија, а во групата од втората фаза ќе одат двете најуспешни селекции.