Јовица Зафировски, претставник на приватните превозници во Град Скопје, вели дека системот „Сејф сити“ неправедно ги санкционира автобусите, без да ги земе предвид специфичните услови во кои тие сообраќаат низ градот.
Проблемот најчесто се јавува во услови на густ сообраќај и отсуство на посебни жолти ленти, кога долгите автобуси влегуваат на раскрсница на трепкаво зелено светло, но поради должината не успеваат целосно да ја поминат пред да се вклучи црвеното.
Во такви случаи, како што изјави Зафировски за Сител, камерите автоматски го регистрираат поминувањето како прекршок за црвено светло, по што следуваат високи парични казни и одземање на возачката дозвола.
Превозниците предупредуваат дека ваквите санкции може да предизвикаат сериозни последици за јавниот превоз, бидејќи немаат доволен број возачи за замена, а поголем број изречени забрани за управување би можеле да доведат до паркирање на автобусите и нарушување на редовниот сообраќај.
Тие бараат автобусите да бидат третирани како посебна категорија со поголема толеранција во рамки на системот „Сејф сити“, а како можност за надминување на проблемот предлагаат и поврзување на ГПС-системите во автобусите со семафорите, со што би се овозможило нивно вклучување во „паметниот“ зелен бран и избегнување на ваквите ситуации. објави Скоп