Градоначалникот на град Скопја, Орце Ѓорѓиевски, нагласи дека дивоградбите не се неодамнешен проблем, туку резултат на, како што рече, „неактивноста на институциите 30 години по ред“.
„Ова не се проблеми што траат еден месец. Дури и пред независноста, но и потоа, на одредени луѓе им е дозволено да узурпираат државно земјиште. Имаме згради во паркови, паркинзи, па дури и на пешачки и велосипедски патеки, без никакви дозволи“, изјави Ѓорѓиевски во емисијата Топ Тема.
Тој направи споредба со купување возило без документација.
„Не можам да купам возило без документи“, нагласи градоначалникот.
Ѓорѓиевски информираше дека веќе се потпишани меморандуми за соработка за заедничко дејствување со некои општини, додека инспекции се извршени во Центар, Чаир и Карпош. Како пример, тој го спомена објектот во близина на Холидеј Ин, за кој беше поднесено барање за легализација, но кое беше одбиено од општината ВЦентар.
„Објект на булеварот не може да се легализира, ова не е во согласност со законот. Чекаме да помине законскиот рок и тој објект ќе биде отстранет“, рече тој.