Премиерот Христијан Мицкоски по Самитот Европска Унија – Западен Балкан во Тиват изјави дека процесот на проширување на Европската Унија останува жив, но дека Македонија нема да прифати нови отстапки без јасен и извесен крај.
„Ова се моменти кога Европската Унија, односно Европскиот совет, јасно кажува дека процесот на проширување останува жив. Наша задача е тој процес да го зачуваме, да напредуваме, но истовремено да не го изгубиме достоинството“, рече Мицкоски.
Тој нагласи дека Владата е подготвена брзо да ги спроведува реформите, но дека нема да влезе во „авантура без јасен крај“.
За средбата со Мерц
Премиерот ја оцени средбата со германскиот канцелар Фридрих Мерц како „исклучително конструктивна“.
„Уставните измени кои ги прифати претходната Влада беа тема на разговорот, но нашиот став е тој – ние заслужуваме многу повеќе од потпросечни политички медиокритети да ни ја креираат европската судбина“, истакна Мицкоски.
Тој изрази задоволство и од разговорите со францускиот претседател Емануел Макрон и претседателката на Европската комисија, Урсула фон дер Лајен.