Основното јавно обвинителство Штип поведе истражна постапка против 38-годишна доцентка на Универзитетот „Гоце Делчев“ (УГД) во Штип, жителка на Кочани, поради основано сомневање дека примила поткуп од студент за преодна оценка.
Според информациите од Обвинителството, професорката се товари за кривично дело примање поткуп по член 357 од Кривичниот законик. На 16 јуни годинава, откако студент не покажал доволно знаење за да помине на испит, професорката наместо да евидентира дека студентот паднал, таа не му ја впишала оценката во индексот ниту во електронскиот систем, туку директно му побарала 300 евра за да му напише преодна оценка.
„На 29 јуни, во нејзината канцеларија, таа ги примила парите од студентот. Му дала инструкции да ги остави парите на помошната маса, помеѓу скрипта и еден лист бела хартија, по што во индексот му запишала преодна оценка“, соопштија од Обвинителството.ото.
Од Универзитетот „Гоце Делчев“ во Штип соопштија дека целосно ги поддржуваат активностите на надлежните институции во борбата против корупцијата.
Во реакцијата на Универзитетот се наведува дека во академската заедница нема место за лица што ја злоупотребуваат својата позиција, го нарушуваат интегритетот на образованието и ја изневеруваат довербата што им е дадена.