Компании што ќе вложат во американско производство, како „Епл“ (Apple), ќе бидат ослободени од новите давачки. Претседателот на САД, Доналд Трамп, објави воведување царина од 100 отсто на увоз на полупроводници, со цел да го поттикне враќањето на технолошкото производство во земјата.
Трамп ја најави мерката од Овалната соба, заедно со директорот на „Епл“, Тим Кук, кој откри план за дополнителна инвестиција од 100 милијарди долари во домашно производство. „Епл“ веќе има активни проекти со партнери како „Корнинг“ (Corning), „Самсунг“ (Samsung) и ТИ (Texas Instruments).
Неколку големи компании, вклучувајќи ги и ТСМЦ (TSMC) и „Самсунг“, добија потврда дека нема да бидат засегнати од новите царини, бидејќи веќе најавија инвестиции во САД. Мерката предизвика позитивна реакција на пазарите, со раст на акциите на технолошките компании.
Трамп најави и можни дополнителни царини на широка палета електронски производи што користат чипови, меѓу кои и автомобили, апарати и мобилни уреди. Аналитичарите предупредуваат на можни нарушувања во глобалните синџири на снабдување, бидејќи многу компании сè уште зависат од производството во Источна Азија.
Инаку, САД ќе воведат 50 отсто царина на увозот од Индија, делумно поради нејзиното продолжено купување руска нафта. Тоа е проблематично за „Епл“, бидејќи голем дел од ајфон-уредите се произведуваат токму таму. Дополнително, Виетнам ќе се соочи со царина од 20 отсто, што може да влијае врз производството на „епл воч“, „ајпад“ и „мекбук“.
И покрај тоа што завршната монтажа на ајфон засега нема да биде во САД, Трамп изрази задоволство од насоката на компанијата: „’Епл’ се враќа во Америка“, изјави тој, фалејќи ја инвестицијата како „недостижна за која било друга земја“.
