Претседателката Гордана Сиљановска-Давкова денеска во Брисел оствари средба со амбасадорите на земјите членки на групата „Пријатели на Западен Балкан“. Разговорите се однесуваа на регионалната соработка и европската перспектива на земјите од регионот.
На средбата со претставниците на Хрватска, Грција, Унгарија, Италија, Словачка и Чешка, претседателката им се заблагодари за поддршката што овие земји ѝ ја даваат на Македонија во евроинтегративниот процес. Таа истакна дека, и покрај блокадата на пристапните преговори, земјава останува цврсто посветена на патот кон Европската Унија.
Како доказ за оваа посветеност ги посочи усогласеноста на македонското законодавство со правото на ЕУ, целосната усогласеност со заедничката надворешна и безбедносна политика, како и забрзаното спроведување на Реформската агенда – што е забележано и во последниот извештај на Европската комисија.
Сиљановска-Давкова изрази очекување дека забрзувањето на пристапниот процес на Македонија и пошироката интеграција на Западен Балкан ќе бидат меѓу приоритетите на претстојните претседателства со Советот на ЕУ, особено за време на грчкото и италијанското претседателствување.