На 63-годишнината од катастрофалниот земјотрес, точно во 5 часот и 17 минути, главниот град на Македонија се разбуди со колективна тага и сеќавање на трагичното утро кога голем дел од градот исчезна за миг, порача претседателката Гордана Сиљановска-Давкова.
На денешен ден во 1963 година, силниот земјотрес однесе 1.070 животи, повреди повеќе од 2.000 луѓе, а десетици илјади домови беа целосно разурнати. Страшната слика од урнатините и денес, по шест децении, продолжува да предизвикува длабока и нескротлива тага кај скопјани и сите граѓани на Македонија, порача претседателката ГорданаСиљановска-Давкова.
„Денеска, 63 години подоцна, не се разбуди само Скопје, туку и колективното сеќавање на скопјани“, се наведува во објавата по повод годишнината. Тагата е пропратена со благодарност за невидената светска солидарност што ја доби градот во најтешките моменти. Помошта од целиот свет беше клучна за обнова на Скопје.
И покрај огромната трагедија, градот се возроди. Како што се вели во познатата детска песна, „градот убав пак никна и процвета“, објави претседателката.
Жителите на Скопје и сите македонски граѓани денес им оддаваат почит на загинатите и изразуваат благодарност до сите поединци, организации и држави кои помогнаа во справувањето со последиците од катастрофата.
„Ни останува вечната обврска да не ги заборавиме загинатите сограѓани и да се грижиме за нивното и нашето сакано Скопје“, се порачува во денешното сеќавање од претседателката Гордана Сиљановска-Давкова.