ЕУ вклучи зелено светло за поддршка на железничкото поврзување Скопје – Софија, политичката линија се уште во ќорсокак. Антонио Кошта претседателот на Европски Совет, порача дека ставањето заеднички потпис е голем чекор кој промовира добрососедски односи.
– Го поздравувам потпишувањето на договорот за прекуграничен тунел меѓу Бугарија и Македонија – кој е голем чекор во соработката меѓу двете земји и промовира добрососедски односи. Покрај развојот на билатерални врски, новата железница ќе го поттикне регионалниот просперитет и ќе ја зајакне нашата заедничка безбедност!
И еврокомесарката за проширување Марта Кос на социјалните мрежи порача дека договорот е важен чекор за градење доверба меѓу двете земји.
– Бугарија и Македонија се согласија да ја унапредат работата на Коридорот 8. Ова е клучен проект што ги поврзува Јадранското Море со Црното Море преку пат и железница и важен чекор за градење доверба преку регионална поврзаност, заеднички просперитет и контакти меѓу луѓето.
Франција го поздравува потпишувањето на Договорот за меѓуграничниот железнички тунел на Коридор 8 меѓу Македонија и Бугарија, што вчера во Ѓуешево го сторија заменик-претседателот на Владата и министер за транспорт Александар Николоски и бугарскиот вицепремиер и министер за транспорт и врски, Гроздан Караџов, во присуство на претставници на Европската комисија, НАТО, и на банките кредитори на проектот за железничко поврзување на двете држави.
Портпаролот на француското министерство за Европа и надворешни работи Паскал Конфавре во изјавата, која ја даде вчера, а денеска ја пренесува Француската Амбасада во Скопје, нагласува дека овој потпис сведочи за посветеноста на двете држави во прилог на регионалната интеграција и безбедноста на Балканот.
– Франција го поздравува денешното потпишување на договорот меѓу Бугарија и Македонија, кој се однесува на изградбата на прекуграничен железнички тунел. Оваа стратешка инфраструктура е дел од проектот за развој на трансевропскиот Коридор 8, кој ги поврзува Јадранското и Црното Море. Овој потпис сведочи за посветеноста на Бугарија и Северна Македонија во прилог на регионалната интеграција и безбедноста на Балканот – нагласи Конфавре.
Тој дополни и дека овој договор сведочи и за способноста на, како што рече, „нашите два сојузника да го пронајдат патот на доверлив и плоден дијалог, што Франција целосно го поддржува, особено во перспектива на пристапувањето на Македонија и на Западен Балкан во Европската Унија“.
Македонија и Бугарија се обврзаа на активности за изградбата на железничкиот тунел на Коридорот 8 со вчерашното потпишување на Договорот.
Вчера министерот Николовски и неговиот бугарски колега Караџов подадоа рака во Ѓуешево и заеднички ставија потпис за подготовка, изградба и оперативност на меѓуграничниот железнички тунел меѓу Македонија и Бугарија, кој е дел од пругата на Коридорот 8. Договорот опфаќа изградба на меѓуграничен железнички тунел со проектирана должина од околу 2,4 километри.
На политичката пруга Скопје – Софија, пак, премиерот Мицкоски веќе најави засилена динамика во разговорите, по нова година.