Нови поскапувања на храната и раст на трошоците за живот, вистината е дека народот нема пари. Вака Социјалдемократскиот сојуз на Македонија преку соопштение денеска упати критики до Владата и премиерот Христијан Мицкоски, обвинувајќи ги за лошо управување со економијата и пад на животниот стандард на граѓаните. Од партијата велат дека тврдењата за наводни економски успеси се целосно невистинити.
- „Лагите на Мицкоски за наводните економски успеси и за тоа дека Македонија е трета економија во Европа се целосно разобличени. Вистината е дека граѓаните живеат сè потешко, дека имаат сè помалку пари во џебовите затоа што сè е поскапено“, стои во партиското соопштение.
Од СДСМ потсетуваат на последните официјални статистички податоци, кои според нив јасно го потврдуваат трендот на поскапување и растот на трошоците за живот.
- „Трошоците на животот во мај годинава се зголемени за 4,8 проценти во споредба со истиот месец минатата година, додека цените на мало бележат пораст од 5,6 проценти“, велат од СДСМ.
Од партијата посочуваат дека растот на платите не е доволен за да го следи поскапувањето, а дополнителен проблем е и немањето нови мерки од страна на Владата за заштита на стандардот на граѓаните. Според опозицијата, секојдневните трошоци како храната, сметките и превозот стануваат сè поголем товар за семејните буџети. Тие алармираат дека синдикалната потрошувачка кошничка континуирано расте, додека реалната куповна моќ на граѓаните опаѓа.
- „Бројките се немилосрдни и ја кажуваат вистината: животот е поскап, животниот стандард е понизок, а граѓаните се посиромашни отколку пред една година. Доста е со лагите“, додаваат од СДСМ во соопштението.
Инаку, Државниот завод за статистика го објави извештајот за индексот на трошоците на живот во мај во кој се вели дека има зголемување од 4,8 отсто во однос на истиот месец претходната година.